ХҮНИЙ ЭРХ ХАМГААЛАГЧИЙН ТОГТОЛЦОО ОН ЦАГИЙН ХЭЛХЭЭ



2021.04.02

Улсын Их Хурлаас 2021 оны 04 дүгээр сарын 02-ны өдөр Хүний эрх хамгаалагчийн эрх зүйн байдлын тухай хуулийг баталж, 2021 оны 07 дугаар сарын 01-ний өдрөөс хэрэгжиж эхэлснээр Хүний эрх хамгаалагчийн үндэсний тогтолцоо бүрдэв.

2022.06.02

Улсын Их Хурлын 2022 оны 06 дугаар сарын 02-ны өдрийн 28 дугаар тогтоолоор Комиссын Хүний эрх хамгаалагчийн асуудал эрхэлсэн гишүүн томилогдов.

2022.11.03

Хүний эрх хамгаалагчийн эрх зөрчигдсөн эсэх талаар дүгнэлт гаргах чиг үүрэг бүхий орон тооны бус Хүний эрх хамгаалагчийн хорооны гишүүдийг сонгон шалгаруулж Комиссын хуралдаанаар батламжилж, Хороо байгуулагдав.

ХҮНИЙ ЭРХ ХАМГААЛАГЧ

Ганцаараа, эсхүл бусадтай эвлэлдэн нэгдэж, хүний эрх хамгаалах үйл ажиллагаа явуулж байгаа, түүнд оролцож байгаа хүнийг хэлнэ.

ХҮНИЙ ЭРХ ХАМГААЛАХ ҮЙЛ АЖИЛЛАГАА

Хүний эрх, эрх чөлөөг хөхиүлэн дэмжиж, хүний эрх, эрх чөлөөг зөрчсөн үйлдэл, эс үйлдэхүйн эсрэг хүчирхийллийн бус, тайван аргаар үзэл бодлоо илэрхийлж, олон улсын эрх зүйн нийтээр хүлээн зөвшөөрсөн хэм хэмжээ, зарчмыг хүндэтгэж, аливаа хэлбэрээр хүний эрхийг хамгаалахыг хэлнэ.

ҮНДСЭН ЗАРЧИМ

Монгол Улсын Үндсэн хууль, бусад хуулийг сахин биелүүлэх; Шударга, хүнлэг ёсыг эрхэмлэх; Авлига, ашиг сонирхлын зөрчлөөс ангид байх; Ялгаварлан гадуурхахгүй байх; Бусдын нэр төр, алдар хүнд, эрх, хууль ёсны ашиг сонирхлыг хүндэтгэх.

ХОРИГЛОХ ЗҮЙЛ

Хүчирхийллийн арга хэрэглэж, тайван бус аргаар үйл ажиллагаа явуулах, явуулахыг уриалах; Хүний эрх хамгаалагчийн үйл ажиллагааг хувийн ашиг сонирхолд ашиглах; Хүний эрх, эрх чөлөө, бусдын нэр төр, алдар хүнд, ажил хэргийн нэр хүндийг гутаах.

САНХҮҮГИЙН ИЛ ТОД НЭЭЛТТЭЙ БАЙДАЛ

Санхүүгийн эх үүсвэр:

Хуульд өөрөөр заагаагүй бол хүн, хуулийн этгээдээс өгсөн хандив, тусламж; Хуульд заасны дагуу төрөөс үзүүлсэн мөнгөн болон бусад хэлбэрийн санхүүгийн дэмжлэг; Хууль тогтоомжоор хориглоогүй бусад эх үүсвэр.

Санхүүгийн дараах эх үүсвэрийг хориглоно:

Гадаад улсын тусгай албад, түүний халхавч байгууллага болон үндэсний эв нэгдлийг бусниулах, мөнгө угаах, террорист болон экстремист үйл ажиллагаа явуулдаг, санхүүжүүлдэг байгууллага, хувь хүнээс, эсхүл хандивлагч нь тодорхойгүй санхүүжилт авах; Хуулиар зөвшөөрснөөс бусад аргаар санхүүгийн нөөц, эх үүсвэрийг хайх, хүлээн авах, захиран зарцуулах.

ТӨРИЙН БАЙГУУЛЛАГА, АЛБАН ТУШААЛТАН, ХУУЛИЙН ЭТГЭЭДИЙН ҮҮРЭГ

• Хүний эрх хамгаалагчийн эрхийг хүлээн зөвшөөрөх, зөрчихгүй байх;
• Үйл ажиллагаанд нь хүндэтгэлтэй хандах;
• Хүчирхийллийн бус, тайван аргаар үйл ажиллагаа явуулах боломж бүрдүүлэх;
• Шаардлагатай мэдээллээр хангах;
• Хуульд заасан үндэслэлгүйгээр хүний эрх хамгаалагчид аливаа хэлбэрээр халдахгүй байх;
• Хүний эрх хамгаалагчийн үйлдлийг хамгаалах зохицуулалтыг байгууллагын дотоод журамд тусгаж, хэрэгжүүлэх, сургалт зохион байгуулах;
• Хүний эрх хамгаалагчид халдсан тухай мэдээлэл, гомдлыг шийдвэрлэсэн хариуг гомдол гаргагчид болон Хүний эрх хамгаалагчийн хороонд бичгээр хүргүүлэх.
• Цагдаагийн байгууллага хүний эрх хамгаалагчид халдсан халдлагыг таслан зогсоох, түүнийг өөрийнх нь зөвшөөрснөөр, эсхүл Хүний эрх хамгаалагчийн эрх зүйн байдлын тухай хуульд заасан эрсдэлийн үнэлгээний дүгнэлтийг үндэслэн Гэрч, хохирогчийг хамгаалах тухай хуульд заасан журмын дагуу хамгаалалтад авна.
• Хүний эрх хамгаалагчийн эрх зөрчигдсөн тохиолдолд хуулиар хариуцсан чиг үүргийн хүрээнд шаардлагатай арга хэмжээг шуурхай авч хэрэгжүүлнэ.