Хүний эрхийн Үндэсний Комиссоос хүүхдийн хүний эрхийн мэдлэг, ойлголтыг нэмэгдүүлэх, хүний эрхийн зөрчлөөс урьдчилан сэргийлэх зорилгоор хүний эрхийн сургагч багш бэлтгэж, Ерөнхий боловсролын сургуульд хүний эрхийн боловсрол олгох үйл ажиллагааг тасралтгүй зохион байгуулж байгаа билээ.

Энэ хүрээнд МУИС-ийн Үндсэн хуулийн эрх зүйн хүрээлэнтэй хамтран "Үндсэн хууль манай сургуульд" сургагч багш бэлтгэх анхны сургалтыг 2023 оны 05 дугаар сарын 19-ний өдөр зохион байгуулж байна.

Сургалтаар

• ХЭҮК-ын гишүүн, хууль зүйн доктор Г.Нарантуяа

-Үзэл бодлоо чөлөөтэй илэрхийлэх эрх

• ХЭҮК-ын гишүүн, хууль зүйн доктор Д.Сүнжид,

-Тэгш эрх

• ХЭҮК-ын гишүүн, хууль зүйн доктор Б.Энхболд,

-Халдашгүй, чөлөөтэй байх эрх

• Үндсэн хуулийн Цэцийн гишүүн, хууль зүйн доктор Д.Гангабаатар

-Сонгох, сонгогдох эрх

•  Улсын Дээд шүүхийн шүүгч, хууль зүйн доктор Ц.Цогт

-Шударгаар шүүлгэх эрх

• УИХ-ын даргын Хууль зүйн бодлогын зөвлөх, хууль зүйн доктор О.Номинчимэг

-Дижитал орчин дахь хүүхдийн эрх

• МУИС-ийн Үндсэн хуулийн эрх зүйн хүрээлэнгийн захирал, профессор, хууль зүйн доктор О.Мөнхсайхан

-Хууль дээдлэх ёс

• МУИС-ийн Хууль зүйн сургуулийн Нийтийн эрх зүйн тэнхимийн багш Э.Туулайхүү

-Амьд явах эрх сэдвийн хүрээнд ХЭҮК-ын дэргэдэх Иргэний нийгмийн зөвлөл, "Хүчирхийллийн эсрэг үндэсний төв", Хууль зүйн үндэсний хүрээлэн, Хүүхэд ивээн тэтгэх хөтөлбөр, Шүүхийн шийдвэр гүйцэтгэх ерөнхий газрын харьяа Сургалт-Хүмүүжлийн тусгай байгууллага, "Хүний эрхийн дэвшилтэд бодлогын хүрээлэн", Монголын Эмнести интрнэшнл, Ханнс-Зайделийн сан, Германы Олон улсын хамтын ажиллагааны нийгэмлэг, "Нархан" асрамжийн газар, "Бодлогод залуусын хяналт" ТББ, "Сэтгэлзүйн мэдрэмж", "Гүнж төв", "Боловсрол эвсэл", "МЭХДХ",  "ЛГБТ" төв, "Бор тагшны бодол" ТББ, Монголын ахмадын холбооны гишүүд болон хууль, өмгөөлөгч нарт хичээл зааж байна.

Сургагч багш бэлтгэх сургалтыг нээж, ХЭҮК-ын дарга Ж.Хунан “Хүний эрхийн түгээмэл Тунхаглал батлагдсаны 75 жилийн ой энэ 2023 онд тохиож байна. Хүний эрийн Үндэсний Комиссоос иргэдийн эрх, эрх чөлөөг хангаж, хамгаалахын төлөө, хүний эрхийн зөрчлөөс урьдчилан сэргийлэх чиглэлд тасралтгүй ажиллаж байна.

Аливаа улсын иргэн бүр эрх, үүргээ мэддэг, мөн чанарыг нь ойлгож, ухамсарлаж чадвал өөрийн эрхээ хамгаалах, хамгуулах, зөрчигдсөн эрхээ сэргээлгэхээр нэхэмжилжлэх, эрхээ баталгаажуулахаар холбогдох газарт нь хандах боломж нээгдэнэ гэж үздэг.

ХЭҮК-оос хүний эрхийн боловсрол олгох сургалтыг тогтмол явуулдаг. Ялангуяа хүний эрхийн ойлголт, мэдлэгийг бага наснаас эхлэн олгох хамгийн үр дүнтэй.

Тиймээс Ерөнхий боловсролын сургуулийн сурагчдын хүний эрхийн мэдлэг, ойлголтыг нэмэгдүүлэх, хүний эрхийн зөрчлөөс урьдчилан сэргийлэх зорилгоор сургагч багш бэлтэх сургалтыг анх удаагаа зохион байгуулж байна. Сургагч багш бэлтгэх боломжийг бүрдүүлж, олгосон судлаачдын болон санхүүжүүлэгч, дэмжигч нартаа баярлаж талархсанаа илэрхийлье.

Хүний эрх, эрх чөлөөг хүн бүрт эдлүүлэхийн төлөө

Хүн бүрийг хүний эрх, чөлөөний мэдлэгтэй болгохын төлөө хамтран зүтгэе” гэлээ.

"Үндсэн хууль манай сургуульд" дээрх төслийг АНУ-ын олон улсын хөгжлийн агентлагийн санхүүжилтээр Бүгд найрамдахчуудын олон улсын хүрээлэн болон Азийн сангийн хамтран хэрэгжүүлж буй “Залуучууд, эмэгтэйчүүдийн сонгууль, улс төрийн оролцоог идэвхжүүлэх нь” хөтөлбөрөөс санхүүжүүлж, УИХ-ын даргын Ажлын албаны дэмжлэгтэйгээр Үндсэн хуулийн эрх зүйн хүрээлэнгээс хэрэгжүүлсэн юм.

Иргэдийн болон Ерөнхий боловсролын сургуулийн сурагчдын Үндсэн хууль, хүний эрхийн мэдлэгийг дээшлүүлэх зорилгоор хэрэгжүүлсэн уг төслийн хүрээнд нийт найман сэдвээр гарын авлага, сургалтын материалыг бэлтгэн боловсруулж, НҮБ-ын хүний эрхийн хороо болон Хүүхдийн эрхийн хорооноос гаргасан Ерөнхий тайлбар (General comment)-ыг орчуулах ажлыг судлаачтай хамтран гүйцэтгэсэн.

Монгол Улсын Хүний эрхийн Үндэсний Комиссоос МУИС-ийн Үндсэн хуулийн эрх зүйн хүрээлэнтэй хамтарсан "Үндсэн хууль манай сургуульд" сургагч багш бэлтгэх сургалтаас бэлтгэгдсэн дээрх багш нар нь Ерөнхий боловсролын сургуулийн сурагчид, Их, дээд сургуулийн оюутан, залууст хичээл заах замаар хүний эрхийн ойлголт, боловсролыг нэмэгдүүлэх юм.

"Үндсэн хууль манай сургуульд" төслийн судлаачдын бүрэлдэхүүнийг танилцуулъя.

• Монгол Улсын Үндсэн хуулийн Цэцийн гишүүн, Хууль зүйн доктор Д.ГАНГАБААТАР
• Монгол Улсын Дээд шүүхийн шүүгч, Хууль зүйн доктор Ц.ЦОГТ
• Монгол Улсын Хүний эрхийн Үндэсний Комиссын гишүүн, Хууль зүйн доктор Д.СҮНЖИД
• Монгол Улсын Хүний эрхийн Үндэсний Комиссын гишүүн, Хууль зүйн доктор Г.НАРАНТУЯА
• Монгол Улсын Хүний эрхийн Үндэсний Комиссын гишүүн, Хууль зүйн доктор Б.ЭНХБОЛД
• Монгол Улсын Их Хурлын даргын зөвлөх, Хууль зүйн магистр О.НОМИНЧИМЭГ
• МУИС-ийн Хууль зүйн сургуулийн багш, Хууль зүйн магистр Э.ТУУЛАЙХҮҮ
• Хууль зүйн үндэсний хүрээлэнгийн ахлах судлаач, Хууль зүйн доктор Б.ТҮМЭНДЭМБЭРЭЛ